الثلاثاء، 2 أكتوبر، 2012

بالتفصيل اسهل طريقة لترتيب نيش السفره بالصور للعرائس

بالتفصيل اسهل طريقة لترتيب نيش السفره بالصور  للعرائس

طريقة ترتيب نيش السفرة
هنا مجموعه نصايح و افكار ممكن تستعدك في ترتيب النيش بتاعك ( النيش هو الدولاب اللي مع السفره لو اسمه مختلف بين الدول العربيه ) ممكن ضلفتين او تلاته او اربعه واجهته زجاج و الجوانب ايضا و ضهره مرايات يترص فيه الكاسات و الاكواب و طقم الصيني و الاركوبال و غيره.


اول حاجه طريقه فرش النيش
مفرش السفره بيكون معاه مفارش مربعه صغيره احد زواياها مشغوله بالتطريز افرشيه على الرفوف و خللي الزاويه المثلثه المشغوله نازله من على الرف زي الصوره 
و في كمان مفارش مربعه بتتباع لوحدها مش لازم تكون مع مفرش السفره ممكن تشتري و تعملي لوك جديد للنيش بالمفارش دي و غالبا بيكون احلى لون الابيض و البيج و كمان بيكون لونهم ملاءم للكاسات بس طبعا انتى و ذوقك و ذوق فرش السفره



ترتيب الاطقم:
في البدايه و انتى بتشتري الاطقم ركزي على لونين ما تكتريش علشان يكون في تلائم مع بعضهم و ما يكونش شكلهم مشوه النيش و كمان حتقدري لو حتجيبي مفارش للنيش لونها بنى مثلا او زيتي فا مش حيكون الالوان للمفارش  متناقضه مع الوان اطقمك و حيكون شكلها حلو اوي
الكاسات خللي الطويل ورا و القصيرين قدام و ما تكتريش في العدد لان الجمال في البساطه








طقم الشاي بيترتب ان البراد في النص و حواليه الفناجين و ممكن توقفي وراه السرفيس لو نفس الشكل
في استاندات مخصوصه للنيش تقدري توقفي عليها السرفيس علشان يكون ثابت و وقفته مش خطر عليه و على باقي الحاجات





اطقم الخشاف بيكون الطبق الكبير في النص و جواه الاطباق الغيره ممكن لو حجم الصواني عندك ينفع يتحط في النيش حطيها على استاندات برضه لو ما نفعش حطيها في الادراج
اهم حاجه الbalance او التوازن بين الناحيه اليمين و الشمال ما تخليش ناحيه مليانه اكتر من ناحيه او الكاسات الطويله متركزه في ناحيه اكتر من ناحيه  اقفى بعيد و بصي للنيش و انتى حتحسي ان في توازن بين التوزيع و للا لاء






شنطه المعالق ممكن تحطيها زي ما هيه و ممكن تخرجي المعالق و تحطيها في درج المعالق مع طبق التقسيم اللي بيكون جوه الشنطه علشان يكونوا مترتبين في الدرج






طقم الصيني او الاركوبال لو له مكان في النيش اختاري القطع اللي تناسب النيش و حطيها و الباقى رصيه في الدولاب اسفل النيش و طبعا ما ترصيش الاطباق الصيني و الافضل ان كل الصيني يترتب جوه الدولاب
خللي عندك طقمين كاسات مش غالين اوي جوه المطبخ للاستعمال للضيوف علشان ما تفضيش النيش و تفتحيه كل شويه 
ممكن تزيني النيش باي اكسسوارات او شموع او ورود مجففه بس برضه في اضيق الحدود لان سر جمال النيش هوه بساطته
يا رب يكون عرضي للموضوع عجبكم و فادكم




ردود الأفعال:

0 التعليقات:

إرسال تعليق

Related Posts Plugin for WordPress, Blogger...
هذه مدونة تخص المرأة ، ونحن نهدف لان نفيد المرأة من خلالها ، والله الموفق. تدعمه Blogger.